Die Leeus speel hul laaste Super-rugbywedstryd op hul oorsese toer sonder hul inspirerende Springbok-haker, Malcolm Marx.

Dié stewige Bok-haker word die vyfde lid van die Leeus-groep die afgelope klompie dae wat terugkeer Suid-Afrika toe. Hy volg kort op die hake van die hoofafrigter, Swys de Bruin (stres), die verdedigingsafrigter, Joey Mongalo (skuldigbevinding aan onsedelike aanranding), Courtnall Skosan (pa se siekte) en die jong losskakel Gianni Lombard (kniebesering).

Marx se terugkeer is om ’n ruskans te kry en die Springbok-protokol te volg.

Jan-Henning Campher is die nuwe haker wat hom by die span aansluit en hy sal waarskynlik op die plaasvervangerbank begin, met Sean Reynolds wat hom ook in Christchurch by die span sal aansluit as plaasvervanger vir Lombard.

Marx sal ’n verlengde rustydperk hê, deurdat die Leeus aanstaande week met hul terugkeer na Suid-Afrika ’n loslootjie sal hê.