Die reël wat die All Blacks laat in 2018 gehelp het om Engeland in Londen te klop, is deur Wêreldrugby hersien.

Daar was omstredenheid nadat Nieu-Seeland die toets met 16-15 gewen het en ’n drie deur die Engelse se Sam Underhill nie toegeken is nie. Dit nadat die skeidsregter beslis het dat Courtney Lawes onkant was toe hy ’n hangskop van die All Blacks se plaasvervanger-skrumskakel, TJ Perenara, afgestorm het.

Die beheerliggaam is nie veronderstel om reëls in die jaar waarin die Wêreldbeker-toernooi beslis word te verander nie, maar beskryf die verandering aan die bewoording van dié reël eerder aan “hersiening” toe, berig stuff.co.nz.

Die verandering aan die reël, wat nie amptelik deur Wêreldrugby aangekondig is nie, is dat die onkantlyn by ’n losgemaal nou nie meer geposisioneer sal wees by die agterste voet nie, maar eerder by “die agterste punt van enige speler van enige van die twee spanne”, byvoorbeeld ’n kop of arm.

Die omstredenheid was omdat daar onsekerheid was oor of dit ’n duikslag of ’n losgemaal was.

Volgens die nuwe verandering sou Lawes nie onkant gewees het nie, omdat hy agter sy spanmaat George Ford was, wat op die grond was nadat hy ’n duikslag uitgevoer het.

John Jeffrey, voorsitter van die komitee van Wêreldrugby wat verantwoordelik is vir die reëls, het aan The Times gesê die verandering het op aandrang van Brett Gosper, die beheerliggaam se uitvoerende hoof, plaasgevind.

“Die uitvoerende hoof het na die komitee gekom en gevra: ‘Kan ons duidelikheid oor die reël kry?’ Hy wou duidelikheid verkry oor wat onkant is. Is dit die voet of die agterste deel van die liggaam? Ons moes die bewoording verander,” sê Jeffrey.

Die verandering sal reeds geld in die Sesnasies-reeks, wat die eerste naweek van Februarie begin.