Swys: ‘My aandag by Leeus ondanks Bokke’

Message Topic Search Topic Options Post Reply Create New Topic Printable Version Translate Topic

   https://www.netwerk24.com/Sport/Rugby/swys-my-aandag-by-leeus-ondanks-bokke-20190113

Die Leeus se afrigter, Swys de Bruin, erken daar is onderhandelinge om hom in die aanloop tot die Wêreldbekertoernooi heeltyds by die Springbokke se bestuurspan in te skakel, maar sê sy aandag is “100%” by sy trop in die Goudstad.

“Daar is onderhandelinge aan die gang, maar jy gaan moeilikheid hê as jy toelaat dat jou aandag afgetrek word,” sê hy aan Rapport.

“Ek weet baie ondersteuners wil weet wat aangaan en dit is eenvoudig: Daar is onderhandelinge, maar my aandag gaan beslis nie afgetrek word terwyl ons met Superrugby besig is nie.”

De Bruin het aan Rapport vertel die kanse is goed hy sal meer betrokke raak by Rassie Erasmus se bestuurspan in die oploop tot die Wêreldbeker, maar vir nou wil hy net op sy span se kanse in vanjaar se Super Reeks konsentreer

“Daar is definitief onderhandelinge aan die gang maar ek probeer my aandag 100 persent op die Leeus vestig,” het De Bruin aan Rapport gesê.

“Sodra jy jou mind split het jy moeilikheid. Ek weet baie van die ondersteuners wil weet wat met my aangaan en dis eenvoudig. Daar is onderhandelinge maar ek gaan definitief nie terwyl ons besig met Super Rugby is, my aandag van die Leeus aftrek nie. Definitief nie.”

Sy taak by Ellispark gaan nie maklik wees nie.

Die Leeus se sukses van drie agtereenvolgende eindstryde gaan ná die verlies van etlike spelers moeilik herhaal word. Dit beteken hulle sal meer op jong spelers moet staatmaak en dit kan tyd neem om die afgelope drie seisoene se welslae na te doen.

“Ons het baie spelers verloor. Die belangrikstes is Jacques van Rooyen, Franco Mostert, Jaco Kriel, Rohan Janse van Rensburg en Ruan Dreyer.

“Gelukkig het ons junior spanne die afgelope twee jaar goed gevaar. Baie van ons jong manne gaan nou geleenthede kry.”

De Bruin wil nie voorspellings waag nie.

“Ek wil nie my mening lug of te gou praat nie. Uiteraard wil ons so goed as moontlik doen. Ons wil ons volle potensiaal gebruik om so goed te speel as wat ons kan. Ek gaan nie die druk op daai ouens sit deur hulle te vergelyk met die span van die afgelope drie jaar nie. Dis onregverdig, want daar is veral onder ons voorspelers baie nuwelinge,” sê hy.

“Daar is in ons groep van 40 slegs 17 wat al Superrugby gespeel het, so meer as die helfte van die groep het geen ervaring op daardie vlak nie. Dis vir ons opwindende nuwe tye. Ek is optimisties omdat ek weet hoe hard ons junior afrigters gewerk het. Ek glo in ons strukture.

“Ek het ’n baie goeie gevoel en glo ons kan oor ’n jaar of twee ’n topspan wees.”

Wat veral vir De Bruin verblydend is, is die ervare spelers wat in die Goudstad bly. Hulle gaan van kritieke belang vir die veldtog wees.

Die Leeus gaan ook nie hul speelstyl verander nie.

“Die ruggraat van ons span – Malcolm Marx, Marvin Orie, Warren Whiteley, Ross Cronjé, Elton Jantjies en Andries Coetzee – is nog daar. Hulle is Bokke. Maar ons gaan beslis vir Franco mis. Hy is ’n ongelooflike speler. Ruan was ons ankerman.

“Dít is vanjaar ons uitdaging. Ons benadering bly dieselfde. Ons gaan steeds drieë druk en ons wil mense deur ons spel inspireer.

“Dit sal dwaas wees om daarvan af te wyk, veral as jy kyk na die soort spelers wat opgang maak.

“Wandisile Simelane, Manny Rass, Giani Lombard is, om net ’n paar te noem, baie lekker spelers met flair.”

De Bruin weet ook dat jy soms net op talentvolle jong spelers moet staatmaak. Wie nie waag nie, wen nie.

As hulle in die proses nóg ’n diamant vir die Bok en die Leeus se diepte uitbou, is almal ongeag die telbord in elk geval wenners.