Die Haaie veroordeel die gebruik van verbode middels in enige vorm en respekteer die werk wat die Suid-Afrikaanse Instituut vir Dwelmvrye Sport (Saids) doen.

So het die franchise Woensdag by navraag gesê nadat Saids aan Netwerk24 bevestig het die Haaie se Springbok-haker Chiliboy Ralepelle het positief getoets vir die gebruik van die groeihormoon zeranol.

Ralepelle het Dinsdag op die radioprogram The Marawa Sport Show gesê hy het vleis sedert 2014 uit sy dieet gesny. Zeranol is ’n estrogeenonderdrukker wat vir beeste ingespuit word.

’n Sportdokter, Jon Patricios, het vroeër aan Netwerk24 gesê die algemeenste wyse waarop ’n atleet zeranol kan inkry, is deur vleis te eet wat daardeur besmet is. Dít is wat in 2017 met die Amerikaanse naelloper Ajee Wilson gebeur het. Sy is onskuldig bevind.

Zeranol kan ook ingespuit of deur aanvullings ingekry word, hoewel die kans van laasgenoemde skraal is.

“Die Haaie is hoogs proaktief om herhaaldelik ons spelers te onderrig en leiding te verskaf oor regulasies oor die gebruik van verbode middels en die verantwoordelike gebruik van aanvullings,” sê die Haaie.

Ralepelle se vrou, Margaux, is ’n vegetariër. Daar word dus min vleis in die Ralepelle-huishouding geëet en die haker moet sy proteïeninhoud deur onder meer ’n verskeidenheid aanvullings inkry.

Saids het Woensdag bevestig dat Ralepelle sy reg uitgeoefen het om sy B-monster te laat toets. As dié toets ook positief is, sal die haker moet besluit of hy skuldwil beken of ontken.

As hy skuld ontken, sal ’n tugverhoor volg. In so ’n verhoor sal dit rugbaar word hoe Ralepelle die middel ingekry het, sê Saids. ’n Straf sal dan opgelê word.

Ralepelle (32) is in 2014 twee jaar lank geskors vir die gebruik van ’n anaboliese steroïed. As hy weer skuldig bevind word, kan dit sy loopbaan beëindig aangesien hy dan langer gestraf sal word.

“Ons kan nie verder kommentaar lewer totdat die geregtelike proses afgehandel is nie,” sê die Haaie.

Die Suid-Afrikaanse Rugbyunie wou ook nie kommentaar lewer nie.