Koning Leeu van Ellispark, Swys de Bruin, se onderhandelinge met sy franchise beweeg al hoe nader aan ’n doodloopstraat.
Hy het die week nee gesê vir ’n aanbod om sy kontrak as hoofafrigter van die Leeus te verleng nadat onderhandelinge tussen die partye al ’n ruk lank sloer.
Dit het nou ’n punt bereik waar die franchise se senior afrigters bewus is dat De Bruin plaaslik en oorsee rondkyk vir ’n nuwe geleentheid.
Rapport verneem ’n kleinerige bedrag is die rede vir die geskil tussen die Leeus en die De Bruin-kamp.
’n Gevoel bestaan dat De Bruin ná al die jare nie werklik op Ellispark na waarde geskat word nie.
Soos by die ander franchises, moet die Leeus deesdae egter ook elke sent omdraai om finansieel volhoubaar te wees.
Verskeie spelers volg De Bruin-hulle se onderhandelinge met belangstelling. Dit kan ’n invloed hê op hul besluit om by die franchise te bly of nie.
Van die sterre wat nog nie hul kontrakte verleng het nie, is spelers soos Elton Jantjies, Lionel Mapoe, Malcolm Marx, Andries Coetzee en Ruan Combrinck.
Nie De Bruin of sy agent, James Adams, kon gister bereik word nie. Rudolf Straeuli, uitvoerende hoof van die Leeus, het nie op Rapport se navraag reageer nie.
De Bruin se voorganger, Johan Ackermann, is ook besig met onderhandelinge om sy kontrak met die Engelse klubspan Gloucester te verleng.
Stephen Vaughan, uitvoerende hoof van Gloucester, het aan www.gloucestershirelive.co.uk gesê dat hulle vir Ackermann beslis wil behou. Hy het dit ook beklemtoon dat hulle Ackermann nie sal verhinder om ’n internasionale span soos die Springbokke af te rig nie.
“Ons sal nooit in iemand se pad staan om ’n nasionale span af te rig nie. Ek wil dít nou benadruk. Ons het geen (sulke) klousules in kontrakte nie.
“Daar was dalk ’n morele kode toe Johan ingekom het. Dit sou ’n bietjie wees soos om ’n speler aan te sê hy mag nie vir sy land speel nie.
“Ons het uitdruklik aan Johan gesê as die oproep ooit sou kom om byvoorbeeld hoofafrigter van Suid-Afrika te word, ons nie in sy pad sal staan nie. Hy sal (die Bokke) met ons beste wense kan afrig.”