Terwyl gepoog word om die vure van onmin in Kaapse rugby te blus, is sy afrigterskorps in die visier van oorsese klubs.
Drie van die Westelike Provinsie se voorste afrigters kan deur oorsese klubs opgeraap word, met twee Franse klubs wat die hardste na die Kaapse breiers vry.
Agente van die Franse Top14-klubs Racing92 en Montpellier het reeds kontak met John Dobson (spesialis-afrigter), Norman Laker en Dawie Snyman (albei hulpafrigters) se agente oor hul toekomsplanne gemaak. Na verneem word, is daar ook belangstelling van minstens een Suid-Afrikaanse franchise.
In ’n week waarin Zelt Marais, die WP-president, in ’n onderhoud met Rugby365 vure probeer doodslaan het oor die onmin wat in Kaapse rugby woed, het die WP onder meer ’n skeidingspakket aan Paul Treu aangebied.
Marais het in sy onderhoud met die rugbywebtuiste gesê die Kaap is steeds Hollands.
Treu, wat verlede jaar een van die Stormers se hulpafrigters was, het Woensdag met Paul Zacks, die WP se uitvoerende hoof, vergader. Marais het volgens Rapport se inligting daarop aangedring om die vergadering by te woon.
Twee opsies is vir die voormalige Blitsbok-breier gebied, waarvan die skeidingspakket een is.
Die ander opsie is dat hy herontplooi word en sy kontrak eerbiedig.
Die uitvoerende komitee van die WPRU (die amateurkant) meen Treu kan steeds ’n positiewe rol iewers in WP Rugby speel.
Geen amptelike verklaring is nog hieroor uitgereik nie.
Ontgogelde Stormers-spelers is wel by monde van MyPlayers ingelig dat nie Treu of Peter de Villiers volgende jaar die Stormers sal afrig nie.
Dit blyk dat daar vir eers ’n skietstilstand tussen die WP se amateurkant en sy sakevleuel is.
Dit volg nadat uitgewys is dat borgskappe, spelerskontrakte en selfs die unie se Superrugby-lisensie in gedrang sou kom as die sakevleuel ontbondel word.
Geen duidelikheid bestaan nog oor Gert Smal se toekoms as die WP se direkteur van rugby nie. Sy kontrak verstryk in Oktober, maar daar het volgens Rapport se inligting nog geen gesprekke tussen hom en sy werkgewer oor sy toekoms plaasgevind nie.
Die kanse lyk goed dat hy hom eerder by Jake White se Japanse klubspan Toyota Verblitz sal aansluit.
Zacks en Marais het nie op Rapport se versoeke om kommentaar gereageer nie.