Leeus se welpies moet brul op Loftus

Die Leeus pak die Bulle Saterdag op Loftus Versfeld in ’n slypwedstryd vir die Superrugby-reeks met ’n rits nuwelinge in hul geledere.

Dit is veral tussen die voorspelers waar daar heelwat nuwe gesigte is. Trouens, die slot Rhyno Herbst is die enigste speler in die agttal wat verlede jaar gereeld deel van die Curriebeker-span was.

Jan-Henning Campher, wat nog verlede seisoen by die Bulle was, kry beginkans as haker, terwyl nóg ’n eertydse Bul, die stut Frans van Wyk, een van die plaasvervangers is.

Nathan McBeth, ’n Junior Springbok wat ook kwalifiseer om toetsrugby vir Skotland te speel, is die loskopstut.

In die agterlyn is daar veel meer ervare spelers, met die heelagter Sylvian Mahuza, wat die span aanvoer.

Van die opwindende jong spelers wat saam met hom is, is Madosh Tambwe, Manny Rass, Tyrone Green, Wandisile Simelane en Gianni Lombard.

Tussen die plaasvervangers is daar enkele spelers met Curriebeker-ervaring, soos die losvoorspelers James Venter en Pikkie de Villiers, asook die haker Pieter Jansen en die voorryman Danie Mienie.

Vir die afrigter, Swys de Bruin, bied die oefenwedstryd die kans om van die jong talent deur te kyk en te sien wie steek hand op om vanjaar Superrugby te kan speel.

Die Leeus, wat die afgelope twee seisoene in die Superreeks se eindstryd verloor het, moet vanjaar sonder staatmakers soos Jaco Kriel, Franco Mostert, Ruan Dreyer, Jacques van Rooyen en Rohan Janse van Rensburg oor die weg kom.

Gevolglik sal verskeie groentjies noodgedwonge by die diep kant van die Superreeks ingegooi word.

Sylvian Mahuza (k), Madosh Tambwe, Manny Rass, Tyrone Green, Wandisile Simelane, Gianni Lombard, Krappie van den Berg, Darren-Lane Landsberg, Vincent Tsitsuka, MJ Pelser, Rhyno Herbst, Ruan Vermaak, Asewathi Ntlabekanye, Jan-Henning Campher, Nathan McBeth. PLAASVERVANGERS: Pieter Jansen, Danie Mienie, Frans van Wyk, PJ Steenkamp, Roelof Smith, James Venter, Pikkie de Villiers, Bradley Thain, Eddie Fouché, Jan-Louis la Grange, Stean Pienaar, Jeanluc Cilliers.