Bulle sit voet neer oor Stassen

Die jong Bul Hendré Stassen móét vir Superrugby aanmeld. Punt.

Die Blou Bulle Maatskappy (BBM) sê hoewel die 21-jarige Stassen die afgelope ruk nuwe hoogtes bereik het in Frankryk, waar hy vir Stade Français speel, was die ooreenkoms dat hy aan die einde van Maart na Pretoria terugkeer vir Superrugby-diens.

En hy sal hieraan moet voldoen.

Die voormalige Springbok-afrigter Heyneke Meyer, deesdae breier van Stade Français, het Stassen, Hanro Liebenberg en André Warner ná die verlede seisoen se Curriebeker-kompetisie as leenspelers na Parys ontbied.

Die ooreenkoms was dat die drie Bulle tot die einde van Maart daar sal uithelp.

Liebenberg en Warner is reeds terug, maar ná die voortreflike vertonings wat Stassen sedertdien in Stade se agttal gelewer het, is daar glo nou planne om sy dienste op die lang termyn te bekom.

Xander Janse van Rensburg, die BBM se hoëprestasiebestuurder, het bevestig dat daar gesprekke tussen die Bulle en Stade Français was, maar sê gerugte dat Stassen vir goed in Frankryk gaan bly, is niks meer as bespiegelinge nie.

“Hy het ’n kontrak met die Bulle en dit moet eerbiedig word. Ons het ’n leenooreenkoms gesluit en dit is niks meer as dit nie.”

Sou Stade wel agter die skerms met Stassen onderhandel, sal dit ’n oortreding van Wêreldrugby se regulasies wees.

Stassen is ’n fisieke en veelsydige speler, wat ewe tuis op slot en flank is.

Met die Springbok-slot RG Snyman wat ’n enkelbesering opgedoen het, laat Stassen se afwesigheid ’n verdere leemte.

Stassen het die week by die Bulle in Sun City, waar hulle ’n spanbou-sessie hou voor die Superreeks aanstaande naweek begin, aangesluit, maar sal daarna weer vir Meyer se span beskikbaar wees.

Daar word by Loftus Versfeld voorspel dat daar ’n toutrekkery op hande is oor Stassen se dienste.

Dit sal nie die eerste keer wees wat daar ’n onenigheid met ’n oorsese klub is nie.

Daar is nou nog ontevredenheid by Ellispark oor die wyse waarop Franco Mostert verlede jaar na die Engelse klubspan Gloucester gelok is.

Johan Ackermann, wat die Leeus afgerig het voor hy as Gloucester se hoofafrigter aangestel is, is nie baie gewild in Leeus-geledere nie oor die wyse waarop hy sy seun, Ruan, Ruan Dreyer, Jaco Kriel en Mostert by sy ou span afgerokkel het.

Die Franse klub Toulon is ook van “vuilspel” beskuldig toe hy in Desember beweer het hy het reeds ’n kontrak met die Springbok-slot Eben Etzebeth gesluit.